ਭਾਰਤੀ ਕ੍ਰਿਕਟ ਟੀਮ ਦੀ ਚੋਣ ਕਰਨ ਵਾਲੀ ਚੋਣ ਕਮੇਟੀ ‘ਚ ਬਦਲਾਅ ਹੋਣ ਜਾ ਰਿਹਾ ਹੈ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਨੇ ਇਸ ਦੇ ਲਈ ਰਸਮੀ ਇਸ਼ਤਿਹਾਰ ਜਾਰੀ ਕੀਤਾ ਹੈ। ਮੌਜੂਦਾ ਚੋਣ ਕਮੇਟੀ ਵਿੱਚ 5 ਮੈਂਬਰ ਹਨ। ਅਜੀਤ ਅਗਰਕਰ ਚੋਣ ਕਮੇਟੀ ਦੇ ਚੇਅਰਮੈਨ ਹਨ। ਟੀਮ ਦੇ ਚਾਰ ਹੋਰ ਮੈਂਬਰ ਸਲਿਲ ਅੰਕੋਲਾ, ਸ਼ਿਵਸੁੰਦਰ ਦਾਸ, ਐੱਸ. ਸ਼ਰਤ ਅਤੇ ਸੁਬਰੋਤੋ ਬੈਨਰਜੀ। ਬੀਸੀਸੀਆਈ ਨੇ ਆਪਣੀ ਅਧਿਕਾਰਤ ਵੈੱਬਸਾਈਟ ‘ਤੇ ਚੋਣ ਕਮੇਟੀ ਦੇ ਮੈਂਬਰ ਲਈ ਨੌਕਰੀ ਜਾਰੀ ਕੀਤੀ ਹੈ। ਇਹ ਨੌਕਰੀ ਇੱਕ ਮੈਂਬਰ ਲਈ ਹੈ। ਹਾਲਾਂਕਿ ਬੋਰਡ ਨੇ ਇਹ ਨਹੀਂ ਦੱਸਿਆ ਹੈ ਕਿ ਮੌਜੂਦਾ ਚੋਣ ਕਮੇਟੀ ਦਾ ਮੈਂਬਰ ਕੌਣ ਹੈ ਜਿਸ ਦੀ ਜਗ੍ਹਾ ਨਵਾਂ ਚੋਣਕਾਰ ਆਵੇਗਾ।
ਬੀਸੀਸੀਆਈ ਦੇ ਨਿਯਮਾਂ ਮੁਤਾਬਕ ਚੋਣ ਕਮੇਟੀ ਵਿੱਚ ਹਰੇਕ ਜ਼ੋਨ ਤੋਂ ਇੱਕ ਮੈਂਬਰ ਹੁੰਦਾ ਹੈ। ਪਰ ਵਰਤਮਾਨ ਵਿੱਚ ਇਸ ਚੋਣ ਕਮੇਟੀ ਵਿੱਚ ਪੱਛਮੀ ਜ਼ੋਨ ਤੋਂ ਦੋ ਮੈਂਬਰ ਅਜੀਤ ਅਗਰਕਰ ਅਤੇ ਸਲਿਲ ਅੰਕੋਲਾ ਹਨ। ਜਦੋਂ ਕਿ ਉੱਤਰੀ ਜ਼ੋਨ ਤੋਂ ਕੋਈ ਮੈਂਬਰ ਨਹੀਂ ਹੈ। ਸ਼ਿਵਸੁੰਦਰ ਦਾਸ, ਸ. ਸ਼ਰਤ ਅਤੇ ਸੁਬਰੋਤੋ ਬੈਨਰਜੀ ਕ੍ਰਮਵਾਰ ਪੂਰਬੀ, ਦੱਖਣੀ ਅਤੇ ਕੇਂਦਰੀ ਜ਼ੋਨ ਦੇ ਮੈਂਬਰ ਹਨ।
ਮੰਨਿਆ ਜਾ ਰਿਹਾ ਹੈ ਕਿ ਕ੍ਰਿਕਟ ਬੋਰਡ ਉੱਤਰੀ ਜ਼ੋਨ ਤੋਂ ਚੋਣ ਕਮੇਟੀ ‘ਚ ਮੈਂਬਰ ਚਾਹੁੰਦਾ ਹੈ, ਜੋ ਚੇਤਨ ਸ਼ਰਮਾ ਦੇ ਅਸਤੀਫੇ ਤੋਂ ਬਾਅਦ ਖਾਲੀ ਹੋਈ ਹੈ। ਇਸ ਦੇ ਲਈ ਪੱਛਮੀ ਜ਼ੋਨ ਦੇ ਕਿਸੇ ਮੈਂਬਰ ਨੂੰ ਜਗ੍ਹਾ ਖਾਲੀ ਕਰਨੀ ਪੈ ਸਕਦੀ ਹੈ। ਪੱਛਮੀ ਜ਼ੋਨ ਦੇ ਦੋ ਮੈਂਬਰਾਂ ਵਿੱਚੋਂ ਇੱਕ ਇਸ ਵੇਲੇ ਮੁੱਖ ਚੋਣਕਾਰ (ਅਜੀਤ ਅਗਰਕਰ) ਹੈ, ਇਸ ਲਈ ਸਲਿਲ ਅੰਕੋਲਾ ਦੀ ਥਾਂ ਖ਼ਤਰੇ ਵਿੱਚ ਹੈ। ਚੋਣਕਾਰ ਬਣਨ ਲਈ ਘੱਟੋ-ਘੱਟ ਯੋਗਤਾ ਵੀ ਤੈਅ ਕੀਤੀ ਗਈ ਹੈ। ਇਸ ਅਹੁਦੇ ਲਈ ਅਪਲਾਈ ਕਰਨ ਵਾਲੇ ਵਿਅਕਤੀ ਲਈ ਘੱਟੋ-ਘੱਟ 7 ਟੈਸਟ ਮੈਚ ਜਾਂ 30 ਪਹਿਲੇ ਦਰਜੇ ਦੇ ਮੈਚ ਜਾਂ 10 ਵਨਡੇ ਅਤੇ 20 ਪਹਿਲੀ ਸ਼੍ਰੇਣੀ ਦੇ ਮੈਚ ਖੇਡੇ ਹੋਣੇ ਲਾਜ਼ਮੀ ਹਨ। ਭਾਰਤੀ ਟੀਮ ਇਨ੍ਹੀਂ ਦਿਨੀਂ ਅਫਗਾਨਿਸਤਾਨ ਦੇ ਖਿਲਾਫ ਤਿੰਨ ਮੈਚਾਂ ਦੀ ਟੀ-20 ਸੀਰੀਜ਼ ਖੇਡ ਰਹੀ ਹੈ। ਸੀਰੀਜ਼ ‘ਚ ਦੋ ਮੈਚ ਖੇਡੇ ਗਏ ਹਨ, ਜਿਨ੍ਹਾਂ ਨੂੰ ਜਿੱਤ ਕੇ ਭਾਰਤੀ ਟੀਮ ਨੇ ਸੀਰੀਜ਼ ‘ਤੇ ਕਬਜ਼ਾ ਕਰ ਲਿਆ ਹੈ। ਹੁਣ ਸੀਰੀਜ਼ ਦਾ ਤੀਜਾ ਅਤੇ ਆਖਰੀ ਮੈਚ 17 ਜਨਵਰੀ ਬੁੱਧਵਾਰ ਨੂੰ ਬੈਂਗਲੁਰੂ ਦੇ ਐੱਮ ਚਿੰਨਾਸਵਾਮੀ ਸਟੇਡੀਅਮ ‘ਚ ਖੇਡਿਆ ਜਾਵੇਗਾ। ਟੀ-20 ਵਿਸ਼ਵ ਕੱਪ 2024 ਤੋਂ ਪਹਿਲਾਂ ਟੀਮ ਇੰਡੀਆ ਲਈ ਇਹ ਆਖਰੀ ਟੀ-20 ਸੀਰੀਜ਼ ਹੈ। ਇਸ ਤੋਂ ਬਾਅਦ ਭਾਰਤੀ ਖਿਡਾਰੀ ਸਿਰਫ ਆਈ.ਪੀ.ਐੱਲ. ਖੇਡਣਗੇ।